News Reporter
સમગ્ર ગુજરાતમાં કાતિલ ઠંડીનું મોજું ફરી વળ્યું છે. ત્યારે વહેલી સવાર ગાઢ ધુમ્મસની ચાદર પણ છવાયેલી રહી હતી. બીજી તરફ હવામાન વિભાગે આગામી ત્રણ દિવસ ગુજરાતના મોટા ભાગના વિસ્તારોમાં વરસાદ પડવાની શક્યતાઓ સેવી છે. હવામાન વિભાગે કરેલી આગાહી પ્રમાણે 26, 27 અને 28 ડિસેમ્બરના રોજ ગુજરાતના મોટા ભાગના વિસ્તારોમાં ગાજવીજ અને ભારે પવન સાથે વરસાદ પડવાની શક્યતા છે. ગુરુવારે કેટલાક જિલ્લામાં વરસાદ વરસ્યો છે.
હવામાન વિભાગની આગાહી પ્રમાણે રાજ્યમાં આવતી કાલથી 28 ડિસેમ્બર સુધી વરસાદની આગાહી છે. હવામાન વિભાગ દ્વારા 27 ડિસેમ્બરના રોજ કચ્છ, અમરેલી, ગીર સોમનાથ, ભાવનગર, બનાસકાંઠા, સાબરકાંઠા, અરવલ્લી, મહીસાગર, પંચમહાલ, દાહોદ, છોટા ઉદેપુર, નર્મદા, સુરત, તાપી, ડાંગ, નવસારી, વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી કરવામાં આવી છે.
વરસાદની આગાહીના કારણે ખેડૂતોની ચિંતા વધી ગઇ છે. કારણ કે વરસાદ પડે તો ઘઉં, જીરુ, કપાસ, ચણા જેવા પાકોમાં નુકસાન થવાની સંભાવના છે. આ વર્ષે આ પહેલા જ અતિવૃષ્ટીના કારણે ખેડૂતોની હાલત કફોડી બની છે અને હવે ફરી વરસાદની આગાહીએ ખેડૂતોની ચિંતા વધારી છે.
આ દરમિયાન અમદાવાદના કેટલાક વિસ્તારોમાં ગુરુવારના રોજ કમોસમી માવઠું પડ્યું હતું. અમદાવાદના મણિનગર, ઈસનપુર સહિત ઘણા વિસ્તારોમાં કમોસમી વરસાદ પડ્યો છે. આ સિવાય બનાસરાંઠાના પાલનપુર, ડીસામાં પણ માવઠુ થયું છે.
