News Reporter
દિવસમાં 10,000 ડગલાં ચાલવું સામાન્ય રીતે હૃદયની તંદુરસ્તી માટે આદર્શ માનવામાં આવે છે, પરંતુ નવા સંશોધનમાં બહાર આવ્યું છે કે દિવસભરમાં થોડું થોડું ચાલવા કરતાં એક સાથે લાંબુ ચાલવું વધુ ફાયદાકારક છે.સંશોધકોનું કહેવું છે કે, તમે કેટલું ચાલો છો તે મહત્વનું નથી, તમે કેવી રીતે ચાલો છો તે મહત્વનું છે. એનલ્સ ઓફ ઇન્ટરનલ મેડિસિનમાં પ્રકાશિત થયેલાં સંશોધન મુજબ, જે લોકો ઓછી કસરત કરે છે પણ દિવસમાં ઓછામાં ઓછી 15 મિનિટ અટક્યા વિના ચાલે છે, તો તેમનું હૃદય સ્વસ્થ રહે છે.
આ 1,500 ડગલાંને બરાબર છે. યુકેમાં 40 થી 79 વર્ષની વયનાં 33,560 પુખ્ત વયનાં લોકો પર નવો અભ્યાસ હાથ ધરવામાં આવ્યો હતો, જેમણે સરેરાશ 8,000 ડગલાં ચાલ્યા હતાં. સહભાગીઓને તેમના ચાલવાના સમયગાળાના આધારે ચાર જૂથોમાં વહેંચવામાં આવ્યાં હતાં.જેમાં 5 મિનિટથી ઓછું ચાલવાવાળા 43 ટકા, 5 થી 10 મીનીટ ચાલવાવાળા 33.5 ટકા, 10 થી 15 મીનીટ ચાલવાવાળા 15.5 ટકા અને 15 મિનિટ અથવા વધુ ચાલવાવાળા 8 ટકા લોકો હતાં.
દરરોજ 5,000 થી ઓછા ડગલા પૂરતાં છે યુનિવર્સિટી ઓફ સિડની અને સ્પેનની યુનિવર્સિટી યુરોપિયાના સંશોધકોએ આઠ વર્ષ સુધી આ લોકોના સ્વાસ્થ્ય પર નજર રાખી હતી. પરિણામ એ આવ્યું કે જે લોકો લાંબા અંતર સુધી ચાલે છે તેમને હૃદય રોગનું જોખમ નોંધપાત્ર રીતે ઓછું હોવાનું જાણવા મળ્યું હતું. જે લોકો દિવસમાં 5,000 ડગલાથી ઓછું ચાલે છે તેમને પણ લાંબા સમય સુધી સતત ચાલતાં હોય તો હૃદય રોગ અને અકાળ મૃત્યુનું જોખમ ઓછું હોય છે.
