News Reporter
અમદાવાદના નામચીન પેલેડિયમ મોલમાં મહિલા સુરક્ષાનો ગંભીર મુદ્દો સામે છે. કેમ કે આ મોલમાં આવેલ મેક્સ શોરૂમ (Max Showroom)નાં ટ્રાયલ રૂમ (Trial room)માં 14 વર્ષની સગીરા કપડાં બદલતી હતી ત્યારે એક હિડન મોબાઈલ (Hidden Phone)માં તેનું વીડિયો રેકોર્ડિંગ થતું હતું. તપાસ કરતા આ મોબાઈલમાં સગીરા (Minor girl)ના આપત્તિજનક ચાર વીડિયો (Offensive video) પણ મળી આવ્યા હતા. ત્યારે આ મામલે એક આરોપી રવિ પ્રજાપતિ (Ravi Prajapati)ની ધરપકડ કરાઈ છે.
ઘટનાની વિગતવાર વાત કરીએ તો, આ ઘટના 1લી ઓક્ટોબરે બપોરના સમયે અમદાવાદના સેટેલાઇટ વિસ્તારમાં રહેતી 42 વર્ષની મહિલા તેમના પતિ અને 14 વર્ષની પુત્રી સાથે મેક્સ શોરૂમમાં ખરીદી માટે ગયા હતા. સગીરાએ કપડાં પસંદ કરીને ટ્રાયલ રૂમમાં પ્રવેશ કર્યો, ત્યારે કપડાં બદલતી વખતે, તેણે ટ્રાયલ રૂમમાં વીડિયો રેકોર્ડિંગ થતું હોય તે હાલતમાં એક છુપાયેલો મોબાઈલ ફોન મળી આવ્યો હતો. તેણે તરત જ ફોન ઉપાડી લીધો અને બૂમો પાડીને પોતાની માતા-પિતાને બોલાવી હતી. ફોનની તપાસ કરતા તેમાં સગીરાના કપડાં બદલતી વખતના ચાર વીડિયો મળી આવ્યા હતા.
ઘટના બાદ સગીરાના માતા-પિતાએ મોલમાં હોબાળો મચાવ્યો હતો. જેથી શોરૂમના સ્ટાફ તથા મહિલા ફ્લોર મેનેજર ત્યાં પહોંચી ગયા હતા. દરમિયાન 27 વર્ષીય રવિ સુરેશભાઈ પ્રજાપતિ નામનો યુવક પણ ત્યાં આવી પહોંચ્યો હતો અને કહેવા લાગ્યો કે, ‘આ ફોન તેનો છે અને તે ટ્રાયલ રૂમમાં ભૂલથી છૂટી ગયો છે.’ જોકે આ મામલે સગીરાના પરિવારે 112 ઈમરજન્સી હેલ્પલાઈન દ્વારા પોલીસને જાણ કરીને ફરિયાદ નોંધાવી હતી.
ફરિયાદ મળતાની સાથે જ પોલીસે આ મામલે તપાસ હાથ ધરી હતી અને ટ્રાયલ રૂમમાંથી મળી આવેલ મોબાઈલની તપાસ કર્યા બાદ પોલીસે પણ પુષ્ટિ કરી છે કે, ટ્રાયલ રૂમમાં સગીરા કપડાં બદલતી હતી તેવા ચાર આપત્તિજનક વીડિયો મળી આવ્યા છે. જેથી પોલીસે આ મોબાઈલ જપ્ત કરી તેની માલિકીનો દાવો કરતા 27 વર્ષીય યુવક રવિ પ્રજાપતિને હિરાસતમાં લીધો હતો. ત્યારે હાલની પોલીસ તપાસમાં આરોપી રવિ પ્રજાપતિ ઓઢવના મુનિસુવ્રત સોસાયટીનો રહેવાસી છે હોવાનું સામે આવ્યું છે.
આ મામલે પોલીસે જણાવ્યું હતું કે, ‘ફોનની તપાસ કરી અને ચાર વીડિયોની પુષ્ટિ કરી છે અને આરોપી રવિ પ્રજાપતિની વિરુદ્ધ ભારતીય ન્યાય સંહિતા (BNS) હેઠળ વોયેરિઝમ (કોઈની અંગત પળોને જોવી) અને જાતીય સતામણીની કલમો, તેમજ પોક્સો એક્ટ (POCSO), ઈન્ફોર્મેશન ટેક્નોલોજી એક્ટ અને એટ્રોસિટી એક્ટ હેઠળ ગુનો નોંધ્યો છે. જોકે આરોપી રવિ, ફોન ભૂલથી ટ્રાયલ રૂમમાં નીચે પડી ગયો હોવાનું વારંવાર રટણ કરી રહ્યો છે. જેથી પોલીસે વધુ તપાસ માટે ફોનને ફોરેન્સિક ટીમને મોકલી આપ્યો છે.’
નોંધનીય છે કે, શહેરમાં મહિલા સુરક્ષાનો મુદ્દો પહેલાથી જ સવાલોના ઘેરામાં છે, ત્યારે શહેરના નામચીન મોલમાં આવી ઘટના બહાર આવતા શહેરમાં રોષ ફેલાયો છે. ત્યારે ગ્રાહકો તથા માતા-પિતાએ મોલ અને શોરૂમમાં સુરક્ષા વ્યવસ્થા મજબૂત કરવાની માગ કરી છે. સાથે જ પોલીસે પણ ટ્રાયલ રૂમનો ઉપયોગ કરતી વખતે સાવચેત રહેવાની સલાહ આપી છે. હાલ આ મામલે પોલીસે આરોપીની ધરપકડ કરી છે અને કાયદેસરની કાર્યવાહી હાથ ધરી છે.
