News Reporter
રાજસ્થાન પોલીસે રવિવારે 30 કરોડ રૂપિયાની છેતરપિંડીના કેસમાં ફિલ્મ નિર્માતા-દિગ્દર્શક વિક્રમ ભટ્ટ (56) સહિત સાત લોકોની ધરપકડ કરી હતી. આ કેસ રાજસ્થાનમાં નોંધવામાં આવ્યો હતો, જ્યારે ધરપકડ અંધેરી પશ્ચિમના વર્સોવામાં યારી રોડ પરથી કરવામાં આવી હતી. મુંબઈ પોલીસે પુષ્ટિ આપી હતી કે આ સંયુક્ત કાર્યવાહી નહોતી.
સૂત્રોના જણાવ્યા અનુસાર, ડિરેક્ટરની ગંગા ભવન એપાર્ટમેન્ટમાંથી ધરપકડ કરવામાં આવી હતી, જ્યાં તેમની ભાભીનો ફ્લેટ આવેલો છે. ઉલ્લેખનીય છે કે, ભટ્ટે અગાઉ એક સત્તાવાર નિવેદનમાં આરોપોને નકારી કાઢ્યા હતા, અને કહ્યું હતું કે “પોલીસને સંપૂર્ણપણે ગેરમાર્ગે દોરવામાં આવી છે.”
એક અઠવાડિયા પહેલા તેમની સામે લુકઆઉટ નોટિસ જારી કરવામાં આવી હતી. ઉદયપુરના ભૂપાલપુરા પોલીસ સ્ટેશનમાં નોંધાયેલી FIR મુજબ, ફરિયાદી, ઇન્દિરા IVF હોસ્પિટલના માલિક, ડો. અજય મુરડિયાએ આરોપ લગાવ્યો હતો કે વિક્રમ ભટ્ટ અને તેમની ટીમે તેમને ફિલ્મ પ્રોજેક્ટમાં રૂ. 30 કરોડથી વધુનું રોકાણ કરવાની લાલચ આપી હતી. તેમને ખાતરી આપવામાં આવી હતી કે ફિલ્મ રૂ. 200 કરોડ સુધીનો નફો કરશે.
આ પ્રોજેક્ટ ડો. મુરડિયાની સ્વર્ગસ્થ પત્નીને શ્રદ્ધાંજલિ તરીકે એક જીવનચરિત્રાત્મક ફિલ્મ બનાવવાનો હતો. જોકે, આરોપોને નકાર્યાના 20 દિવસ પછી, ફિલ્મ નિર્માતા હવે જેલમાં છે. ઉદયપુર પોલીસે સાત દિવસ પહેલા દિગ્દર્શક, તેમની પત્ની શ્વેતાંબરી ભટ્ટ અને છ અન્ય આરોપીઓ સામે લુકઆઉટ નોટિસ જારી કર્યા બાદ આ ઘટના બની છે.અજય મુરડિયા તેમની સ્વર્ગસ્થ પત્નીની વાર્તાને પડદા પર લાવીને તેમનું સન્માન કરવા માંગતા હતા. યોગ્ય ટીમની શોધમાં, તેમણે દિનેશ કટારિયાનો સંપર્ક કર્યો, જેમણે તેમને 25 એપ્રિલ, 2024 ના રોજ મુંબઈના વૃંદાવન સ્ટુડિયોમાં આમંત્રણ આપ્યું. ત્યાં, કટારિયાએ તેમને ફિલ્મ નિર્માતા વિક્રમ ભટ્ટ સાથે પરિચય કરાવ્યો, અને ત્રણેયે તેમની પત્નીના જીવન પર બાયોપિકના નિર્માણ અંગે ચર્ચા કરી.
