ટીબી મુક્ત ખેડા જિલ્લાની દિશામાં મહત્વપૂર્ણ પહેલ: ૩૦૦ ક્ષય દર્દીઓને છ મહિના સુધી પોષણ કીટ અપાશે

નડિયાદ : ટીબી મુક્ત ભારત અભિયાન અંતર્ગત ખેડા જિલ્લાને ક્ષયમુક્ત બનાવવાના સંકલ્પ સાથે ખેડા જિલ્લા વહીવટી તંત્ર અને ખેડા જિલ્લા સેન્ટ્રલ કો-ઓપરેટિવ બેંક લિમિટેડ (કેડીસીસી બેંક), નડિયાદ દ્વારા ‘નિક્ષય મિત્ર’ અભિયાન હેઠળ ક્ષયરોગના દર્દીઓ માટે પોષણ સહાય કીટ વિતરણ કાર્યક્રમનો પ્રારંભ કરવામાં આવ્યો હતો. આ પહેલ અંતર્ગત આગામી છ મહિના સુધી અંદાજે ૩૦૦ ક્ષયરોગના દર્દીઓને બેંક દ્વારા વિનામૂલ્યે પોષણ કીટ આપવામાં આવશે.આ કાર્યક્રમમાં ખેડા-આણંદના સાંસદ દેવુસિંહ ચૌહાણ, જિલ્લા કલેક્ટર એન.વી. ઉપાધ્યાય, કમિશનર કિરણ ઝવેરી, જિલ્લા વિકાસ અધિકારી જયંત કિશોર, જિલ્લા પંચાયત પ્રમુખ હિતેશકુમાર તડવી, કેડીસીસી બેંકના ચેરમેન ડો. તેજસકુમાર પટેલ તથા જિલ્લા ક્ષય અધિકારી ડો. દિનેશભાઈ બારોટ સહિતના મહાનુભાવો ઉપસ્થિત રહ્યા હતા.

ક્ષયરોગ સામેની લડાઈમાં પોષણ સહાય મહત્ત્વપૂર્ણ: સાંસદ દેવુસિંહ ચૌહાણ

કાર્યક્રમને સંબોધતાં સાંસદ દેવુસિંહ ચૌહાણે જણાવ્યું હતું કે લોકભાગીદારીથી શરૂ થયેલો આ સેવા યજ્ઞ ક્ષયરોગના દર્દીઓ માટે આશીર્વાદરૂપ સાબિત થશે. ગામડાં અને છેવાડાના વિસ્તારોમાં રહેતા દર્દીઓને પૌષ્ટિક તથા ગુણવત્તાયુક્ત આહાર મળી રહે તે માટે સમાજના દરેક વર્ગે આગળ આવવું જોઈએ.

તેમણે વધુમાં જણાવ્યું હતું કે જિલ્લામાં ક્ષયરોગના કારણે થતા મૃત્યુદરમાં ઘટાડો અને દર્દીઓના સાજા થવાના પ્રમાણમાં સુધારો થવો એ સકારાત્મક બાબત છે. ક્ષયરોગમાંથી સાજા થયેલા લોકોને પણ ‘નિક્ષય મિત્ર’ બનાવી આ અભિયાનમાં જોડવા જોઈએ. આવા દર્દીઓના અનુભવો અન્ય દર્દીઓનું મનોબળ વધારવામાં અને તેમને નિયમિત સારવાર માટે પ્રેરિત કરવામાં મદદરૂપ થઈ શકે છે.

સામાજિક સંસ્થાઓને આગળ આવવા કલેક્ટરની અપીલ

જિલ્લા કલેક્ટર એન.વી. ઉપાધ્યાયે જણાવ્યું હતું કે ક્ષયરોગના દર્દીઓને નિયમિત સારવારની સાથે પૂરતું પોષણ મળે તે પણ જરૂરી છે. પૌષ્ટિક આહાર દર્દીઓની રોગપ્રતિકારક શક્તિ જાળવવામાં અને સારવાર દરમિયાન સ્વાસ્થ્ય સુધારવામાં મદદરૂપ બને છે.

કેડીસીસી બેંક દ્વારા કરવામાં આવેલી આ સરાહનીય પહેલ બદલ તેમણે બેંકના ચેરમેન ડો. તેજસકુમાર પટેલને અભિનંદન પાઠવ્યાં હતાં. આગામી છ મહિના દરમિયાન જિલ્લાના અંદાજે ૩૦૦ ક્ષયરોગના દર્દીઓને વિનામૂલ્યે પોષણ કીટ પૂરી પાડવામાં આવશે. આ સાથે જિલ્લાના સામાજિક અને સ્વૈચ્છિક સંગઠનોને પણ ક્ષયમુક્ત ખેડા જિલ્લાના અભિયાનમાં સહભાગી બનવા અપીલ કરવામાં આવી હતી.

ચાર વર્ષમાં ક્ષયરોગના નોંધાયેલા દર્દીઓની સંખ્યામાં ઘટાડો

જિલ્લામાં ક્ષયરોગ સામે હાથ ધરવામાં આવેલા પ્રયાસોના પરિણામે નોંધાયેલા દર્દીઓની સંખ્યામાં છેલ્લા ચાર વર્ષ દરમિયાન ઘટાડો નોંધાયો છે. ઉપલબ્ધ આંકડા અનુસાર

• વર્ષ ૨૦૨૨: ૫,૧૩૦ દર્દીઓ

• વર્ષ ૨૦૨૩: ૪,૯૩૫ દર્દીઓ

• વર્ષ ૨૦૨૪: ૪,૭૭૪ દર્દીઓ

• વર્ષ ૨૦૨૫: ૪,૪૩૧ દર્દીઓ

આ આંકડા મુજબ વર્ષ ૨૦૨૨ની સરખામણીએ વર્ષ ૨૦૨૫માં નોંધાયેલા દર્દીઓની સંખ્યામાં ૬૯૯નો ઘટાડો થયો છે. જિલ્લા વહીવટી તંત્ર અને જનસહકારથી ક્ષયરોગ નિયંત્રણ માટેના પ્રયાસો આગળ ધપાવવામાં આવી રહ્યા છે. ચાલુ વર્ષ દરમિયાન પણ દર્દીઓની સંખ્યામાં ઘટાડો નોંધાયો હોવાનું કાર્યક્રમમાં જણાવાયું હતું.

લોકભાગીદારીથી સાકાર થશે ‘ટીબી મુક્ત ખેડા’નું લક્ષ્ય

ક્ષયરોગના દર્દીઓને સમયસર સારવાર, પૌષ્ટિક આહાર અને સામાજિક સહયોગ મળી રહે તે માટે ‘નિક્ષય મિત્ર’ અભિયાન મહત્ત્વપૂર્ણ ભૂમિકા ભજવી શકે છે. કેડીસીસી બેંકની પોષણ સહાય પહેલથી દર્દીઓને સહારો મળશે અને અન્ય સંસ્થાઓ પણ આ પ્રકારની સેવાકીય પ્રવૃત્તિઓમાં જોડાય તેવી આશા વ્યક્ત કરવામાં આવી હતી.

ટીબી મુક્ત ખેડા જિલ્લાનું લક્ષ્ય હાંસલ કરવા માટે નિયમિત સારવાર, પોષણ સહાય, જનજાગૃતિ અને લોકભાગીદારીને વધુ મજબૂત બનાવવાની જરૂરિયાત પર ભાર મૂકવામાં આવ્યો હતો.